आज आषाढाचा पहिला दिवस...
संस्मरण कवितांचे... मित्रांचे...
स्वागत आषाढमेघाचे...
आणि
हरवलेल्या संवादाचे...
        ~~~~~~~~~~

मित्रा मेघा.....

तू आर्तांची व्यथित हृदये दर्शने शांतवीशी
आर्द्रच्छाया शिरि धरुनिया लोपवीशी उदासी |
कीर्तीगीते गुणधवल ती ऐकुनी श्याममेघा
ध्यातो आम्ही तुजसि भावे तूच उःशाप देगा ||

'संवादा'चे सहचर अम्ही आजला शापदग्ध
भेटीगाठी मुळि न उरल्या अंतरे मूक-मुग्ध |
'संवादा'ची पुनरपि करी वाहती शब्दगंगा
आषाढाच्या प्रथम दिनि या दूर नेई वियोगा ||

सांगायाचे म्हणुनि जपले मानसी केवढाले
मित्रा मेघा ! तुजपरि मनी मेघ दाटूनी आले |
बंधुत्वाचे तरल ऐसे गूज तू जाणुनीया
'संवादा'च्या फिरुनि भिजवी शब्दधारेत काया ||

मित्रा मेघा ! कविकुलगुरू कालिदासा स्मरोनी |
उःशापाते मधुरमंत्रित देइ आषाढपाणी ||

© प्रमोद वसंत बापट