काल पुण्यात होतो.भाग्य असे की तुकोबारायांची वारी पाहिली. या वर्षी वारीसाठी आळंदीला जाण्याचे योजत होतो.पण भाग्य नासले आणि जाणे जुळले नाही.पण एका बैठकीसाठी पुण्यात आलो आणि वारीचा वारा चाखला.
वारी हुकलेल्या मला वारीला निघालेले सांगोन गेले :
तुकयाकारणे...
तुकयाची हाक /परिसली ज्यांनी /
मिसळले जनीं / वारीलागी ||
वारीलागी निघे / सारे गणगोत /
अंतरात ज्योत / उजळली ||
उजळली मने / फिटला अंधार /
सारला संसार / निजहस्ते ||
निजहस्ते केले / उघडे कवाड /
हरीचे पवाड / गात आलो ||
गात आलो वाटे /तुकया कारणे /देहुतून त्याने / हाक दिली ||


23/06/2014